Müqəddəs Ramazan ayı başlandı.
Müstəqilliyinə qovuşduqdan sonra Azərbaycanda müxtəlif milli və dini mərasimlər, o cümlədən müqəddəs Ramazan ayı hər il dövlət səviyyəsində təntənəli tədbirlərlə müşayiət olunur. Ölkəmizdə yaşayan bütün müsəlmanlar və digər dinlərin nümayəndələri birliyin və savab əməllərin təcəssümü olan Ramazan ayına böyük sevgi ilə yanaşır, yer üzündə sülhün və əmin-amanlığın bərqərar olması naminə birgə səylər göstərməklə, əsrlər boyu formalaşan nəcib adət və ənənələrimizə öz ehtiram və həmrəyliklərini nümayiş etdirirlər. Azərbaycan Respublikasının Prezidenti cənab İlham Əliyevin rəhbərliyi altında son illər ərzində dünya birliyində Azərbaycan müstəqil dövlət kimi layiqli yer tutmaqla yanaşı, dövlət-din münasibətlərinin inkişafında demokratik ənənələrin, insan hüquq və azadlıqlarının bərqərar olunması yolunda öncül sıralarda gedir. Əziz ağdaşlılar, müqəddəs Ramazan ayının başlanması münasibətilə hər birinizi təbrik edir, ay ərzində sizə möhkəm cansağlığı, firavanlıq, ailələrinizə xoşbəxtlik diləyir, ulu Tanrıdan tutduğunuz oruc ibadətinin qəbul edilməsini və dualarınızın çin olmasını arzulayırıq.
