Ağdaşda xalqımızın ümummilli lideri Heydər Əliyevin anadan olmasının 100 illiyi qeyd olundu.
10 may 2023-cü il tarixdə Ağdaş rayonunda xalqımızın ümummmilli lideri, ulu öndər, görkəmli dövlət xadimi Heydər Əliyevin 100 illik yubileyinə həsr edilmiş tədbirlər keçirilib. Tədbirlərdə rayon İcra Hakimiyyətinin başçısı Tofiq İbrahimov, hüquq-mühafizə orqanlarının rəhbərləri, rayon ictimaiyyətinin nümayəndələri, əmək kollektivlərinin üzvləri ulu öndərin xatirəsini ehtiramla yad edərək abidəsi önünə gül dəstələri düzüblər. Rayon rəhbərliyi Heydər Əliyev Mərkəzinin foyesində Ulu Öndərin 1969-2003-cü illəri əhatə edən dövr ərzində çoxşaxəli fəaliyyətini əks etdirən şəkil və eksponatlara baxış keçirib. Təntənəli yubiley mərasimində əvvəlcə Dövlət Himni səsləndirilib. Ağdaş Rayon İcra Hakimiyyətinin başçısı Tofiq İbrahimov Ulu Öndərin 100 illik yubileyinə həsr olunan mərasimdə Ümummilli Liderin siyasi fəaliyyətinin əsas məqamlarını əhatə edən geniş məruzə ilə çıxış edib. Tədbirdə həmçinin dahi şəxsiyyətin həyat və fəaliyyətinə həsr olunmuş “Əsrin adamı” adlı sənədli film nümayiş etdirilib.
