Ağdaşda Vətən müharibəsi şəhidlərinin ailələri ziyarət olunub
Dekabrın 10-da Ağdaş rayon İcra Hakimiyyətinin başçısı Orxan Hüseynzadə rayonun Şəmsabad və Tofiqi kəndlərində şəhidlərimiz Feruzlu Əlibəy Samir oğlunun, Əliyev Elşad Mehman oğlunun və Maxsudov Bəxtiyar Mənsur oğlunun ailələrini ziyarət edib.
Hər üç qəhrəmanımız tarixi Zəfərimizlə başa çatan 44 günlük Vətən müharibəsində şərəfli döyüş yolu keçib və şəhidlik zirvəsinə ucalıblar.
Görüşlərdə Əlibəy Feruzlunun, Elşad Əliyevin, Bəxtiyar Maxsudovun Vətənimizin ərazi bütövlüyü uğrunda döyüşlərdə göstərdikləri igidliklərdən bəhs olunub. Onların xatirələrinin daim xalqımızın qəlbində yaşayacağı vurğulanıb.
Şəhid ailələrinin qayğıları da öyrənilib. Şəhid ailələrinin üzvləri göstərilən daimi diqqət və qayğıya görə Azərbaycan Respublikasının Prezidenti cənab İlham Əliyevə minnətdarlıqlarını ifadə ediblər.
