Ağdaşda 20 Yanvar faciəsinin 35-ci ildönümü qeyd edilib
20 Yanvar faciəsinin 35-ci ildönümü ilə əlqqədar Ağdaş rayonunda silsilə tədbirlər keçirilib.Rayonun idarə, müəssisə və təşkilatlarında təşkil olunan tədbirlərdə faciə qurbanlarının xatirəsi anılıb, təhsil müəssisələrində xüsusi dərslər keçirilib.
Yanvarın 20-də rayondakı “Şəhidlər” kompleksində anım tədbiri keçirilib, Azərbaycanın müstəqilliyi, ərazi bütövlüyü və suverenliyi uğrunda şahidlik zirvəsinə ucalmış qəhrəman Vətən övladlarının xatirəsi anılıb. Şəhidlərimizin ruhlarına dualar oxunub, şəhid məzarlarının üzərinə gül-çiçək dəstələri düzülüb.
Tədbirdə rayon İcra Hakimiyyətinin başçısı Orxan Hüseynzadə, hüquq-mühafizə orqanlarının, rayonda fəaliyyət göstərən idarə, müəssisə və təşkilatların rəhbərləri, şəhid ailələri, müharibə iştirakçıları, ictimaiyyətin nümayəndələri iştirak ediblər.
Tədbirlər çərçivəsində 20 Yanvar şəhidi Müşviq İsayevin anım mərasimi təşkil olunub, şəhidin ailəsi ziyarət olunub.
Saat 12:00-da rayon ərazisində şəhidlərin xatirəsi bir dəqiqəlik sükutla yad olunaraq, nəqliyyat vasitələrindən səs siqnalları verilib.
Allah şəhidlərimizə rəhmət eləsin!
