Ağdaşda Zəfər gününə həsr olunmuş tədbirlərə start verilib.

30 oktyabr 2021-ci il tarixdə Heydər Əliyev Mərkəzində Vətən Müharibəsinin birinci ildönümünün keçirilməsinə həsr olunmuş tədbirlərə uyğun olaraq rayon Gənclər İdman və Ağdaş Regional Mədəniyyət idarələrinin birgə təşkilatçılığı ilə “Zəfər gününü yaşadan qəhrəmanlar” mövzusuna həsr olunan tədbir keçirildi.
Tədbirdə rayon ictimaiyyətinin nümayəndələri, şəhid ailələrinin üzvləri, qazilər, müharibə iştirakçıları, gənclər və mədəniyyət təşkilatlarının nümayəndələri iştirak edirdi.
Tədbir iştirakçıları əvvəlcə ulu öndər Heydər Əliyevin abidəsi önünə gələrək xatirəsini ehtiramla yad etdilər. Sonra şəhidlər xiyabanı ziyarət edildi.
Heydər Əliyev Mərkəzinin foyesində gənc rəssamların Zəfər gününə həsr olunmuş əl işlərindən ibarət sərgiyə baxış keçirildi. Gənc rəssamların bir qrupuna hədiyyələr təqdim olundu.
Mərkəzin konfrans zalında davam edən tədbirdə Dövlət Himni səsləndirildi, şəhidlərin xatirəsi 1 dəqiqəlik sükutla yad edildi. Ön cərgələrdə ağdaşlı şəhidlərin portretləri düzülmüşdür.
Rayon Gənclər və İdman idarəsinin rəisi tədbirdə çıxış edərək qeyd etdi ki, dövlət başçısı, Silahlı Qüvvələrin Müzəffər Ali Baş Komandanı cənab İlham Əliyevin rəhbərliyi altında Azərbaycan Ordusu 28 il düşmən tapdağında qalan torpaqlarımızın 44 gün ərzində işğaldan azad edilməsini təmin etməklə, rəşadətli Ordumuzun gücünü bütün dünyaya nümayiş etdirdi.
Sonra 44 günlük Vətən Müharibəsini əks etdirən videoçarx nümayiş etdirildi.
Şuşa şəhərinin işğaldan azad edilməsində xüsusi xidmətləri olan rayonun Ağzıbir kəndində doğulub boya-başa çatmış, xüsusi təyinatlı hərbi hissədə qulluq edən Vətən Müharibəsi Qəhrəmanı, mayor Gündüz Səfərlinin həyatı və hərbi xidmət yoluna həsr olunmuş videoçarx nümayiş etdirildi.
Səhnəyə dəvət olunan Şuşanın fatehlərindən biri olan Gündüz Səfərli Vətən Müharibəsi və bu müharibənin tarixində xüsusi yeri olan Şuşa əməliyyatı barədə məzmunlu çıxış etdi. Qəhrəmana yerli rəssam Məlahət İsmayılqızının çəkdiyi portret və qiymətli hədiyyələr təqdim edildi.
Sonda Gəncə Dövlət Dram teatrının təqdimatında “Sən azadsan, Şuşa” adlı bədii kompozisiya nümayiş etdirildi və tamaşaçılar tərəfindən alqışlarla qarşılandı.