Ağdaşda şəhid Fərid Məmmədzadənin doğum günü qeyd olundu.

20 avqust 2021-ci il tarixdə torpaqlarımızın bütövlüyü uğurunda gedən döyüşlərdə qəhrəmancasına şəhid olan Ağdaş şəhərində doğulub boya-başa çatmış şəhid Məmmədzadə Fərid Mehman oğlunun doğum günü münasibətilə şəhərin Məşəd küçəsinin giriş hissəsində inşa edilən xatirə bulağının açılış mərasimi keçirildi.
Tədbirdə rayon İcra Hakimiyyəti, Səfərbərlik və Hərbi Xidmətə Çağırış üzrə Dövlət Xidməti rayon şöbəsinin əməkdaşları, Gənclər və İdman İdarəsinin  nümayəndələri, məktəblilər, şəhidin ailə üzvləri, döyüş yoldaşları və yaxınları  iştirak edirdi.
Tədbirdə Dövlət himni səsləndirildi. Şəhidin xatirəsi bir dəqiqəlik sükutla yad edildi.
Rayon Mədəniyyət Mərkəzinin dəstəyi ilə məktəblilərin ifasında bədii kompozisiya təqdim edildi.
Tədbir şəhidin məzarı önündə davam etdirildi. Məzarın üzərinə tər gül dəstələri düzüldü. Döyüş yolundan söhbət açıldı, ruhuna dualar oxundu, ehsan süfrəsi təşkil edildi.
Qeyd edək ki, 44 günlük Vətən müharibəsində göstərdiyi qəhrəmanlığına görə Məmmədzadə Fərid Mehman oğlu Azərbaycan Respublikasının Prezidenti, Silahlı  Qüvvələrin Ali Baş Komandanı cənab İlham Əliyevin müvafiq sərəncamları ilə “Vətən uğrunda”, Füzulinin azad olunmasına görə” və “Cəsur döyüşçü” medalları ilə təltif edilib. 
Tədbirdə şəhidin “Füzulinin işğaldan azad olunmasına görə” təltif olunduğu medal atasına təqdim edildi.
Allah rəhmət eləsin!