Xalq şairi Fikrət Qoca vəfat edib.
Ağdaşın böyük rəmzlərindən biri olan xalq şairi, gözəl insan, dəyərli ziyalı Fikrət Qocanın vəfatı xəbəri rayon ictimaiyyətini dərindən kədərləndirmişdir.
Fikrət müəllim böyük zəhməti və istedadı sayəsində ötən əsrin 60-cı illərindən başlayaraq Azərbaycan ədəbiyyatının zəngin ənənələrindən məharətlə bəhrələnərək xalqın ruhuna yaxın ədəbi yaradıcılığı ilə oxucuların qəlbinə daxil olmuş, novatorluqla yaratdığı düşündürücü poetik nümunələr, nəsr əsərləri, eyni zamanda ömrünün müdriklik zirvəsində xalqımıza həqiqi yol göstərən publisistik yazıları ilə vətənpərvərlik hisslərinin aşılanmasında böyük fədakarlıq nümayiş etdirmişdir.
Vətəninə hədsiz dərəcədə bağlı olan Fikrət Qoca çoxşaxəli fəaliyyəti ilə ölkəmizin, eyni zamanda doğulub boya-başa çatdığı rayonun ictimai-siyasi və mədəni həyatında fəal iştirakı və xeyirxah xüsusiyyətləri ilə daim xatırlanacaqdır.
Qürurlandırıcı haldır ki, hələ sağlığında ikən Fikrət müəllimin zəngin yaradıcılıq yolu dövlətimiz tərəfindən layiqincə qiymətləndirilmiş, ona böyük el məhəbbəti qazandırmışdır.
Rayon ictimaiyyəti bu hüznlü günlərdə xalq şairi, həmyerlimiz Fikrət Qocanın vəfatı ilə əlaqədar mərhumun ailəsinə və yaxınlarına dərin hüznlə başsağlığı verir.
Allah rəhmət eləsin!
