Bu gün möhtərəm Prezident cənab İlham Əliyevin doğum günüdür.

24 dekabr 2020 | 11:00

Çox hörmətli cənab Prezident,
Müzəffər Ali Baş Komandan,
Sizi doğum günü münasibətilə səmimiyyətlə təbrik edirik.
Rəhbərliyiniz altında böyük zəfərlərə imza atan müstəqil Azərbaycan Sizin müdrik və uzaqgörən siyasətiniz, eləcə də fədakar əməyiniz nəticəsində ölkə daxilində və onun hüdudlarından kənarda böyük uğurlar əldə etmiş, xalqımızın həyat və rifah səviyyəsi daha da artmışdır.
Azərbaycanın dövlət maraqlarına dərin bağlılığınız, xalqımıza göstərdiyiniz təmənnasız xidmətlər hər birimiz üçün örnək mənbəyidir.
“Qarabağ Azərbaycandır!” mesajı ilə diplomatik müstəvi və döyüş meydanlarına qatılmaqla Siz böyük zəfər əldə etdiniz.
Sizin rəhbərliyiniz və komandanlığınız altında Azərbaycanın 30 ilə yaxın dövr ərzində torpaq bütövlüyü həsrətinə 44 gün ərzində son qoyuldu. Siz bizlərə sözlə ifadə edilə bilməyən böyük qürur hissləri yaşatdınız. Bayraqlarımızın işğaldan azad edilən torpaqlarda, o cümlədən Qarabağın incisi olan Şuşa üzərində əzəmətlə dalğalanmasına görə Sizə dərin təşəkkürlərimizi bildiririk.
Bu əlamətdar doğum gününüzdə ağdaşlılar adından Sizə və ailənizə uzun ömür, möhkəm cansağlığı, ailə səadəti, firavanlıq diləyir, ali dövlət vəzifələrinizin icrasında bol-bol zəfərlər arzulayırıq.

Keçidlər