Ağdaşda taxıl biçininə başlanmışdır
2020-ci ilin məhsulu üçün rayon ərazisində 18363 hektar sahədə taxıl əkini aparılmışdır. Bunlardan 4290 hektarı buğda, 14073 hektarı arpa, o cümlədən 12997 hektarı dən üçün əkilmiş sahədir.
Rayonda taxıl sahələri aqrotexniki qaydalara uyğun becərilmiş, becərmə dövründə fermerlər tərəfindən əkin sahələri gübrə və bitki mühafizə vasitələri ilə təmin edilmişdir.
Havaların quraqlıq keçməsinə baxmayaraq suvarma suyundan istifadə nəticəsində rayon ərazisində yetişdirilən taxıl əkininin vəziyyətini qənaətbəxş hesab etmək olar.
2020-ci ilin taxıl biçini kampaniyasının optimal müddətdə başa çatdırılması üçün taxılçılıq təsərrüfatlarının sahiblərinə və fermerlərə, dövlət vəsaiti hesabına xarici ölkələrdən alınmış və yüksək texniki parametrlərə malik kombaynlardan səmərəli istifadə edilməsi məqsədilə müvafiq tövsiyələr verilmiş, taxıl biçininin vaxtında və itkisiz həyata keçirilməsi üçün bütün imkanlar səfərbər edilmişdir.
Qeyd edək ki, cari ilin biçin kampaniyasına 52 ədəd kombaynın cəlb edilməsi nəzərdə tutulmuşdur. Onların 15 ədədi “Aqrolizinq” ASC-nə, 5 ədədi yerli sahibkarlara məxsus olmaqla, 32 ədədi kənar rayonlardan dislokasiya olunmuş kombaynlardır.
