Ağdaşda 8 Mart-Beynəlxalq Qadınlar Günü qeyd edildi.

“Ağ Saray” şadlıq evində keçirilən tədbirdə rayonun yerli icra strukturları, bələdiyyə qurumları, təhsil, səhiyyə, mədəniyyət və digər sahələrdə çalışan, həmçinin  ictimai təşkilat və birlikləri təmsil edən fəal qadınların bir qrupu iştirak edirdi.
Rayon icra hakimiyyəti başçısının birinci müavini İsmayıl Yusifzadə qadınları rayon rəhbərliyi adından bayram günü münasibəti ilə təbrik etdi. O, çıxışında bildirdi ki, Azərbaycan xalqının ümummilli lideri Heydər Əliyevin diqqət və qayğısı sayəsində qadınların ölkənin ictimai-siyasi həyatına inteqrasiyası üçün əlverişli şərait yaradılmış, gender məsələlərinin həllində əhəmiyyətli dönüşə nail olunmuşdur. Qeyd olundu ki,  Azərbaycan Respublikasının Prezidenti cənab İlham Əliyevin rəhbərliyi altında dövlət quruculuğu proseslərində qadınların yaxından iştirakı, onların ölkənin ictimai-siyasi, sosial-iqtisadi və mədəni həyatındakı rolu  daim diqqət mərkəzində saxlanılır.
Natiq ölkəmizdə bütün sahələrdə qazanılan uğurlarda qadınların, xüsusilə Azərbaycan Respublikasının Birinci vitse-prezidenti, Heydər Əliyev Fondunun Prezidenti, YUNESKO və İSESKO-nun xoşməramlı səfiri  Mehriban xanım  Əliyevanın danılmaz xidmətlərinin olduğunu diqqətə çatdırdı.
Çıxış edənlər göstərilən diqqət və qayğıya görə ölkə rəhbərliyinə minnətdarlıq hisslərini ifadə etdilər.
Ziyafət süfrəsi ətrafında bədii proqramla müşayiət olunan tədbirdə iştirakçılar rayonun mədəniyyət kollektivləri tərəfindən təqdim edilən rəngarəng konsert proqramına tamaşa etdilər.
Təqdim olunan mahnı və rəqslər alqışlarla qarşılandı.
Qeyd edək ki, təhsil sahəsində səmərəli fəaliyyətinə görə Tofiq İsmayılov adına 8 nömrəli şəhər tam orta məktəbin direktoru Fəridə Səfər qızı Qasımova  Azərbaycan Respublikası Prezidentinin 01 mart 2018-ci il tarixli  sərəncamı ilə “Əməkdar müəllim” fəxri adı ilə təltif edilmişdir.