Ağdaşda 1941-1945-ci illər müharibəsində Qələbənin 71-ci ildönümü qeyd olundu.

9 may 2016-ci il tarixdə  rayonda 1941-1945-ci illər müharibəsində Qələbənin 71-ci ildönümü münasibətilə tədbir keçirildi. Tədbirdə rayon  icra hakimiyyətinin başçısı Tofiq İbrahimov, ictimaiyyətin nümayəndələri, müharibə iştirakçıları, arxa cəbhə veteranları, kütləvi informasiya vasitələrinin nümayəndələri iştirak edirdi.
Tədbir  iştirakçıları tərəfindən əvvəlcə Şəhidlər  abidə-kompleksində Böyük Vətən Müharibəsində həlak olan ağdaşlıların şərəfinə ucaldılan abidə ziyarət edildi, abidənin önündə  xatirə şəkli çəkdirildi, sonra  isə xalqımızın ümummilli lideri Heydər Əliyevin abidəsi önünə gələrək onun nurlu xatirəsinə ehtiram əlaməti olaraq  tər güllər düzüldü.
Qələbə bayramına həsr olunan tədbir Heydər Əliyev Mərkəzində təşkil edilən çay  süfrəsi arxasında davam etdirildi.
Çıxış edənlər 1941-1945-ci illər müharibəsində əldə edilən tarixi  Qələbədə ön və arxa cəbhədə  fədakarlıqla vuruşan  ağdaşlılar barədə  geniş məlumat verdi, müharibənin  davam etdiyi 5 ilə yaxın dövr ərzində 9 mindən artıq  ağdaşlının cəbhəyə səfərbər  olunduğu,  yola salınanların 4 min nəfərinin həlak olduğu və yaralanaraq  şikəst  və əlilliyə məruz qaldığı diqqətə çatdırıldı.
Qeyd olundu ki, müharibənin tarixi qələbə ilə sona çatmasına  ağdaşlılar da  öz layiqli töhfələrini bəxş etmiş, 2 nəfər  ağdaşlı-Fariz Səfərov və Səməd Abdullayev Sovet İttifaqı Qəhrəmanı kimi  yüksək fəxri ada layiq görülmüş, ön və arxa cəbhələrdə nümayiş etdirdikləri böyük döyüş şücaəti və fədakarlıqlarına görə yüzlərlə rayon sakini isə orden və medallarla təltif edildiyi diqqətə çatdırıldı.
Tədbir rayonun mədəniyyət kollektivlərinin  ifasında  rəngarəng konsert proqramı ilə sona çatdı.