Ağdaşda 20 Yanvar faciəsinin qurbanları yad edilmişdir.

"20 Yanvar” faciəsinin 26-cı ildönümü ilə bağlı rayonda silsilə tədbirlər keçirilmişdir. Rayon İcra Hakimiyyəti başçısının sərəncamı ilə təsdiq olunmuş tədbirlər planına əsasən   bütün əmək kollektivləri, təhsil, səhiyyə, mədəniyyət müəssisələrində 20 Yanvar şəhidlərinin xatirəsinə həsr  edilmiş "20 Yanvar faciəsi Azərbaycanın suverenliyi, istiqlaliyyəti və ərazi bütövlüyü uğrunda mübarizənin rəmzidir" mövzusunda anma mərasimləri keçirilmişdir.
18-19 yanvar  2016-cı il tarixlərdə Heydər Əliyev Mərkəzində  uşaq və yeniyetmə  şahmatçılar  arasında   şahmat üzrə rayon birinciliyi yarışları təşkil edilmiş, Olimpiya  idman kompleksində Zərdab rayonu  idmançılarının iştirakı ilə idmanın sərbəst  güləş növü üzrə açıq rayon birinciliyi  keçirilmişdir.
Anım tədbirləri çərçivəsində 20 yanvar şəhidi Müşfiq İsayevin adını daşıyan şəhər tam orta məktəbində şəhidlərin xatirəsinə həsr edilmiş  sənədli xronika  nümayiş etdirilmiş, məktəblilərin ifasında bədii kompozisiya təqdim olunmuşdur. Şəhid Müşfiq İsayevin ailəsinə ərzaq yardımı göstərilmişdir.
20 Yanvar 2016-cı il tarixdə rayon ictimaiyyətinin nümayəndələri “Şəhidlər” kompleksinə gələrək  faciə qurbanlarının  xatirəsini  ehtiramla yad etmiş,  ruhlarına dualar edilmiş, şəhidlərin məzarları üstünə gül-çiçək dəstələri düzülmüşdür. Gün ərzində rayon mərkəzində həzin musiqi səsləndirilmişdir.
Heydər Əliyev Mərkəzində 20 Yanvar şəhidlərinin anılması məqsədilə ehsan süfrəsi təşkil edilmişdir.
20 yanvar 2016-cı il tarixdə saat 12:00-da faciə  qurbanlarının xatirəsi avtomobillərin səs siqnalları vasitəsi ilə bir dəqiqəlik sükutla yad edilmişdir.
Anım mərasimində minlərlə rayon sakini iştirak etmişdir.