Ağdaşda 20 Yanvar faciəsinin 25-ci ildönümü ilə əlaqədar tədbirlər keçirilmişdir.

"20 Yanvar” faciəsinin 25-ci ildönümü ilə bağlı rayonda silsilə tədbirlər keçirilmişdir. Rayon icra hakimiyyəti başçısının müvafiq sərəncamı ilə təsdiq olunmuş tədbirlər planına uyğun olaraq rayonun ayrı-ayrı əmək kollektivləri, təhsil, səhiyyə və mədəniyyət müəssisələrində 20 Yanvar şəhidlərinin xatirəsinin yad edilməsi ilə bağlı  anım mərasimləri keçirilmişdir. Eyni zamanda rayon ərazisində fəaliyyət göstərən təhsil müəssisələrində 16 yanvar 2015-ci il tarixdə  20 Yanvar faciəsi qurbanlarının xatirəsinin anılması məqsədilə xüsusi dərslər keçirilmişdir.

Ağdaş Olimpiya İdman Kompleksində 20 Yanvar şəhidlərinin xatirəsinə həsr edilmiş idmanın sərbəst güləş növü üzrə 8 çəki dərəcəsində açıq rayon birinciliyində Bakı şəhəri, Qəbələ, Oğuz, Göyçay, Ucar və Ağdaş rayonundan olan 100-ə yaxın idmançı iştirak etmiş, qalib idmançılar medallar və qiymətli hədiyyələrlə mükafatlandırılmışdır.

20 Yanvar 2015-ci il tarixdə hüzn günü ilə əlaqədar idarə, müəssisə və təşkilatların üzərindəki dövlət bayraqları matəm əlaməti olaraq endirilmiş, gün ərzində həzin musiqi səsləndirilmişdir.

Rayon ictimaiyyəti nümayəndələrinin iştirakı ilə  “Şəhidlər” kompleksində anım tədbiri keçirilmiş, Azərbaycanın ərazi bütövlüyü və suverenliyi  uğrunda həlak olmuş bütün şəhidlərin ruhlarına dualar oxunmuş, şəhid məzarlarının üzərinə gül, çiçək dəstələri düzülmüşdür.

Saat 12:00-da rayon mərkəzində şəhidlərin xatirəsi avtomobillərin səs siqnalları vasitəsi ilə bir dəqiqəlik sükutla yad edilmişdir.

Anım tədbirlərində minlərlə rayon sakini iştirak etmişdir.