Beynəlxalq Avrasiya Mətbuat Fondu tərəfindən həyata keçirilən “Azərbaycan Gənclərinə Dəstək Proqramı” layihəsi çərçivəsində Ağdaşda görüş keçirilib.
Layihə çərçivəsində 19 avqust 2014-cü il tarixdə Heydər Əliyev Mərkəzində Ağdaş gənclərinə dəstək qrupunun iştirakı ilə keçirilən görüşdə Ağdaş Rayon İcra Hakimiyyəti başçısının birinci müavini Cavid Osmanov, Beynəlxalq Avrasiya Mətbuat Fondunun Proqram departamentinin rəhbəri Ayaz Mirzəyev, “Azərbaycan Gənclərinə Dəstək Proqramı” layihəsinin koordinatoru Qiyas Abbasov iştirak ediblər.
Tədbirdə çıxış edən Beynəlxalq Avrasiya Mətbuat Fondunun Proqram departamentinin rəhbəri Ayaz Mirzəyev, layihənin koordinatoru Qiyas Abbasov, Ağdaş gənclərinə dəstək qrupunun rəhbəri Şəbnəm Məmmədova layihə çərçivəsində həyata keçirilən tədbirlərlə bağlı iştirakçılara məlumat verib. Görüşdə gənclərin zərərli vərdişlərdən çəkindirilməsi və ətraf mühitin sağlamlaşdırılması istiqamətində mövcud problemlərin aradan qaldırılması üçün təkliflər səsləndirilib.
Rayon İcra Hakimiyyəti başçısının birinci müavini Cavid Osmanov yaradılmış dəstək qrupuna müxtəlif layihələrin həyata keçirilməsində daim yardımçı olacaqlarını bildirmiş, rayon gəncləri ilə aparılan işlərdən söz açaraq onların üzləşdikləri problemlərin həlli istiqamətində görülən işlər barədə məlumat vermişdir.
Tədbir hər iki tərəfin razılığı ilə hazırlanmış anlaşma protokolunun imzalanması ilə sona çatmışdır.
